Құқықтық реттеу
21.10.2026
«Богатырь Көмір» ЖШС-нің бас кеңсесінде Екібастұз қаласы прокуратурасының өкілдерімен кездесу өтті. Оған кәсіпорын қызметкерлері мен компаниямен жұмыс істейтін мердігер ұйымдардың өкілдері қатысты.
Кездесуде еңбек заңнамасының сақталуы, еңбек шарттарын тиісті тәртіппен рәсімдеу және еңбекті қорғау талаптарының бұзылуының алдын алу мәселелеріне баса назар аударылды.
Прокуратураның мәліметінше, биылғы жылдың тоғыз айында Екібастұз кәсіпорындарында еңбекті қорғау талаптарының бұзылуына қатысты 9 оқиға тіркеліп, 15 жазатайым жағдай орын алған. Осы оқиғаларды тергеп-тексеру барысында жекелеген жағдайларда жұмыскерлермен еңбек шарттары жасалмағаны анықталған. Прокуратура өкілдері еңбек қатынастарын ресми түрде рәсімдеу жұмыскерлердің құқықтарын қорғаудың және заң талаптарының сақталуын қамтамасыз етудің маңызды шарты екенін атап өтті. Бұл мәселеге мердігер ұйымдармен өзара іс-қимыл жасау кезінде де ерекше назар аудару қажет.
Сонымен қатар кездесу барысында интернет-алаяқтық пен дропперліктің алдын алу мәселелері талқыланды. Прокуратура өкілдері мұндай құқық бұзушылықтар әлі де тіркеліп отырғанын атап өтіп, азаматтардың құқықтық сауаттылығын арттыру мен ықтимал қауіптер туралы ақпараттандырудың маңыздылығына тоқталды.
«Богатырь Көмір» ЖШС-де аталған бағыттар бойынша кәсіпорында жүйелі жұмыстар жүргізілуде. Дәл осы талаптар кәсіпорынмен жұмыс істейтін мердігер ұйымдарға да қойылады.
